Í ljósi yfirstandandi jarðhræringa og möguleika á eldsumbrotum á Reykjanesskaga fylgist neyðarstjórn HS Orku grannt með gangi mála. Virkt samstarf er við almannavarnir, jafnt á landsvísu sem við almannavarnanefndir sveitafélaganna á Reykjanesi, sem og við aðra viðbragðsaðila og Veðurstofu Íslands. Einnig er gott samstarf milli fyrirtækja og stofnana sem eiga og reka mikilvæga innviði í landinu. Þeirra á meðal eru Landsnet, Vegagerðin, Isavia og önnur veitufyrirtæki.
Neyðar- og viðbragðsáætlanir fyrirtækisins hafa á undanförnum árum verið í stöðugri endurskoðun og uppfærslu í takti við þá náttúruvá sem steðjað hefur að starfssvæðum HS Orku. Mörg verkefni hafa verið unnin sem auka öryggi fólks og rekstursins og önnur eru í vinnslu eða undirbúningi. Meðal umbótaverkefna eru:
- Bætt vöktun á mengandi gösum sem borist geta frá eldgosum.
- Nýjar varaaflsstöðvar í Svartsengi sem teknar voru í notkun fyrr á þessu ári.
- Prófanir á ræsingu Reykjanesvirkjunar með varaafli og mögulega spennusetningu á Suðurnesjum.
- Yfirstandandi endurnýjun á lögnum fyrir heitt og kalt vatn til Grindavíkur.
- Yfirferð jarðskjálftavarna gagnvart fallandi hlutum og skemmdum á búnaði.
Áfam verður kappkostað að vöktun og viðbragð sé ávallt tryggt og verða upplýsingar uppfærðar eftir þörfum.