HS Orka og Isavia hafa gengið frá samningum um uppsetningu á fjölda hleðslustöðva fyrir rafbíla á Keflavíkurflugvelli. Um langtímaverkefni er að ræða. Nýjar hleðslustöðvar eru ætlaðar fyrir farartæki Isavia og annarra rekstraraðila á vellinum og einnig fyrir starfsfólk þeirra, en auk þess verða eldri hleðslustöðvar uppfærðar eða þeim skipt út. Um er að ræða allt að 100 AC hleðslustöðvar og allt að 10 DC hraðhleðslustöðvar.
Samkvæmt samningnum sér HS Orka um uppsetningu og viðhald hleðslustöðvanna sem Isavia leigir af félaginu. Þá heldur HS Orka einnig utan um notkun hleðslustöðvanna og hvernig hún skiptist milli aðila. Samningurinn er gerður á grundvelli verðfyrirspurnar sem gerð var á útboðsvef Isavia í byrjun þessa árs.
„Við hjá HS Orku erum mjög spennt fyrir þessu samstarfi með Isavia”, segir Jóhann Snorri Sigurbergsson, forstöðumaður viðskiptaþróunar hjá HS Orku. „Að fá tækifæri til að taka þátt í þeirri uppbyggingu sem á sér stað hjá Isavia, og um leið bjóða lausnir sem auka aðgengi að hleðslustöðvum, er mikilvægt verkefni. Isavia er að gera gangskör í hleðslumálum hjá sér og við vonum að notkun rafbíla muni enn aukast hjá starfsmönnum og rekstraraðilum í framhaldi af þessu.”
„Við hjá Isavia erum afar ánægð með að hafa náð þessu samkomulagi við HS Orku,“ segir Gunnar Ingi Hafsteinsson, deildarstjóri bílastæðaþjónustu hjá Isavia. „Um langtímaframkvæmd er að ræða og þegar henni er lokið verðum við komin með nýjar hleðslustöðvar fyrir farartæki starfsfólks og fyrirtækja á flugvallarsvæðinu. Þetta hjálpar okkur að ná markmiði okkar um kolefnaleysi í eigin rekstri á Keflavíkurflugvelli fyrir árið 2030.“
Fyrsta verkefnið samkvæmt samningnum verður að uppfæra hraðhleðslustöðvar sem þegar eru til staðar fyrir farþega á P2 skammtímastæðum flugvallarins komumegin. Því næst verður þeim hleðslustöðvum á svæðinu sem þarfnast uppfærslu skipt út. Að því loknu verður ráðist í uppsetningu nýrra stöðva fyrir starfsfólk og fyrirtæki. Að endingu verður hugað að því að bæta við rafhleðslu fyrir farþega.