HS Orka og fyrirtækið Grænafl á Siglufirði hafa skrifað undir samstarfssamning um uppsetningu hleðslustöðva fyrir minni fiskiskip og vinnu að orkuskiptum. Grænafl vinnur að orkuskiptum í minni fiskiskipum og hluti af því verkefni er að koma upp hleðslustöðvum fyrir dagróðrabáta í höfnum landsins. HS Orka og Grænafl munu vinna saman að því og fyrsta hleðslustöðin verður sett upp í höfninni á Siglufirði. Styrkur fékkst frá Orkusjóði í það verkefni.
HS Orka hefur tekið virkan þátt í orkuskiptum með uppsetningu hraðhleðslustöðva fyrir rafbíla um allt land í samstarfi við InstaVolt auk þess að bjóða fyrirtækjum og einstaklingum lausnir fyrir hleðslu rafbíla heima fyrir á mjög hagstæðu verði.
„Við hjá HS Orku leggjum mikið upp úr sjálfbærni, t.d. með rekstri Auðlindagarðsins, og tökum það verkefni að Ísland nái kolefnishlutleysi alvarlega. Við höfum fylgst með verkefnum Grænafls og sjáum spennandi tækifæri í orkuskiptum í sjávarútvegi, þar sem við getum útvíkkað starfsemi okkar þegar kemur að hleðslustöðvum. HS Orka telur mikilvægt að styðja við nýsköpun í þessum geira og skapa um leið nýjan markað,“ segir Friðrik Friðriksson, framkvæmdastjóri sölu- og þjónustusviðs HS Orku.
Grænafl leiðir verkefni um orkuskipti í minni fiskiskipum í samstarfi við suðurkóresk fyrirtæki og stofnanir. Framundan er að breyta fyrstu bátunum og setja í þá nýjan búnað svo þeir geti keyrt á rafmagni, ýmist að fullu eða hluta. Þannig verður til ný tækni og ný lausn fyrir minni skip sem munu draga úr olíunotkun landsins og vera þannig liður í vegferðinni að kolefnishlutleysi.
„Við í Grænafli erum afskaplega ánægð með að HS Orka skuli koma með okkur í þetta mikilvæga verkefni. Það er ljóst að orkuskipti eru á fleygiferð og það þarf að huga að uppbyggingu innviða í höfnum landsins. Að fá traust og reynslumikið fyrirtæki eins og HS Orku með okkur í það verkefni er mikils virði og gefur okkur færi á að stuðla að orkuskiptum minni fiskiskipa,“ segir Kolbeinn Óttarsson Proppé, framkvæmdastjóri Grænafls.